وجــــه الـــحــــزن

مايغيب النجم لكـن تحجبـه شمـس النهـار

القمر لولا مغيـب الشمـس ماشفتـه ظهـر

كل شين بالفلك يمشي على حسـب المسـار

معجزات الرب ماهى مـن تصاميـم البشـر

الكواكب بالفضا تسبح علـى خـط ومـدار

والمطر يسقي بقاع الارض من بـر وبحـر

يروي الارض الحزينه عقب طول الانتظـار

يبتهـج منـه ابدويـاً كـان طاويـه الدهـر

الغلا لا مـن تمكـن بالحشـا دون اختيـار

يجبر القلب الشقاوي يسلـك دروب الخطـر

والنصر عقب الهزيمه ينحسـب رد اعتبـار

من رضى بالذل ماله بالزمـن عـز وقـدر

انكشف وجه الحزن من عقب ماطاح الستـار

وضاقت الارض الوسيعه وصبحت مثل الجمر

الليالي اخذلتنـى واشعلـت بالصـدر نـار

مارحمت نفسن طواها الهم واشقاهـا السهـر

ماقويت اصبر وغاب العقل من راسي وطار

وامحلت كل الاراضي عقب ماكانـت زهـر

اظلم الكون بعيوني والزمـن عانـد وجـار

ابتعدنـا والقلـوب ابوسطهـا هـم وكــدر

جاء يوادعنى ولكـن انهمـل دمعـه وثـار

سيطر الصمت ودموعه كنها مجـرى نهـر

ماقدر ينطـق بكلمـه ثـم لـوح واستـدار

عيت ارجوله تشيله طاح مـن ضيـم القهـر

لحظتن فيها بعيني شفـت معنـى الانكسـار

انتثر دمع المحاجـر مابقـا عنـدى صبـر

الامر لو هو بيدينـي ماحصـل ذاك القـرار

قـدر الله والقـدر مكتـوب مامنـه مـفـر