قصيده عن الاخوه

حمـَـام يا اللي فوق الأغصان غنَّـى -- غَـرِّد و أنا بعدك بغرِّد و أغنّي
جّر اللحن و ( اشْلَع ) على ما تمنـّى -- مالي و لا لك غير كـِثر التمنّي
عمرٍ مضى و أنا أسمع اللي يونّا -- و أهِـلِّ دمعي لاسمعته و أونِّـي
ما هو وَلَعْ باللي تِهِزّ و تـثـنـّى -- و لا هو طَرب ؛ من زين صوت المغنّي !
ما زاد من حُــبِّ العذارى حزنـَّا -- مهما على درب المحبَّــة دَعَـنِّي
ما همنـّي بعيونهن لو غزنـّـا -- و ما همني سهم النظر لو طَعَـنِّي
بس الخوي اللي حسبناه مِنَّــا -- و اللي على فرقاه كِنَّـا نـِحِنـّـي
اللي من أول لا بغانا زبَنـّـا -- لامِنّ مِيلات الدهر مَيَّلَـنِّـي
سهمه سِـطَـا بالروح يومٍ طعنّا -- نيران غدره بالحشا ولـّعنـّـي
يا طير قل لي وش حصل في زمنـَّـا -- كيف الذي يَظلم يعيش متهني
كيف الذي نِغْلِيه يَرخِص ثمنـّا -- عن واجبه مَعْنا يِصِدّ و يِكِنـِّـي
حِنـّـا الخطأ يا طير نرفاه حِنـّـا -- و حِنـّا على أحسن ظن دايم نِظِنـِّـي
لكن بعد ما زلّ زاد وغَبَنـّـا -- يوم ادّعى إن الجور يا طير مِنِّي
يا طير ، يا طير السَّعَد لا تَعنـّـا -- و أنا معك يا طير أعينك و أعِنـِّي
خِذني معك يا طير لحظة تُونـّـا -- دامي معك يذهب غثا البال عَنِّي
و إن ردّد القُمْري لحونه و ثَـنّـى -- أردد الألحان بعده و أثَـنِّي